انگلینڈ کرکٹ ٹیم کو 7 سال بعد ہوم ٹیسٹ سیریز میں شکست کا سامنا
برمنگھم(ویب ڈیسک)انگلینڈ کرکٹ ٹیم کو 7برس بعد ہوم ٹیسٹ سیریز میں شکست کا سامنا کرنا پڑا ہے
نیوزی لینڈ نے دوسرے ٹیسٹ میچ میں انگلینڈ کو 8 وکٹوں سے شکست دے کر دو ٹیسٹ میچز کی سیریز ایک صفر سے اپنے نام کی۔
انگلینڈ کی ٹیم اپنی دوسری اننگز میں محض 122رنز بناکر آﺅٹ ہوگئی اور نیوزی لینڈ کو جیت کے لیے 38رنز کا آسان ہدف ملا تھا جو اس نے باآسانی 2وکٹوں کے نقصان پر حاصل کرلیا،
لارڈز میچ ڈرا رہا تھا، 2014میں سری لنکا نے انگلینڈ کو ہوم گراﺅنڈ میں شکست سے دوچار کیا تھا۔ میٹ ہنری میچ اور کونوے سیریز کے بہترین کھلاڑی قرار پائے۔
تفصیلات کے مطابق میزبان الیون نے گذشتہ دن کے اسکور 9 وکٹ 122 رنز سے شروعات کی،
دن کی پہلی گیند پر ٹرینٹ بولٹ نے مہمان ٹیم کو مطلوبہ وکٹ بھی دلوادی، اولی اسٹون کی گیند سے نکلنے والا کیچ وکٹ کیپر ٹام بلنڈل نے باآسانی تھام لیا
اسٹون گذشتہ دن کے انفرادی اسکور 15پر ہی میدان بدر ہوگئے۔جیمز اینڈرسن بغیر کوئی رن بنائے ناٹ آﺅٹ رہے
کیویز کو 38رنز کا آسان ہدف ملا لیکن اس تک رسائی میں بھی ان کے 2کھلاڑی میدان بدر ہوئے، ول ینگ (8)اور ڈیوون کونوے (3) رنز بناکر پویلین واپس ہوئے، قائم مقام کپتان ٹام لیتھم 23پر ناٹ آﺅٹ رہے،
روس ٹیلر نان اسٹرائیکر اینڈ پر کھاتہ کھولے بغیر موجود رہے اور ٹیم کی فتح کا اعلان ہونے پر ڈریسنگ روم واپس آئے، لیتھم نے مارک ووڈ کو تھرڈ مین بانڈری پر چوکا رسید کرکے کیویز کی فتح کو یقینی بنادیا۔
اس سے قبل 2014 میں سری لنکا نے انگلینڈ کو ہوم گرانڈ پر ٹیسٹ سیریز میں مات دی تھی اور اب 7برس بعد کیویز یہاں کامیابی کے جھنڈے گاڑنے والی پہلی ٹیم بن گئی، چوتھے دن محض 11 اوورز کا کھیل ممکن ہوا لہذا گرانڈ آنے والے شائقین چوتھے دن کے پیسے واپس لینے کے حقدار بن گئے۔
